ಆಪರೇಷನ್ ಸಿಂಧೂರ್ ನಲ್ಲಿ ಎದುರಾಳಿಗಳ ಹುಟ್ಟಡಗಿಸಿದ ಬ್ರಹ್ಮೋಸ್‌ ಕ್ಷಿಪಣಿಯ ಖರೀದಿಗೆ ತುದಿಗಾಲಲ್ಲಿ ನಿಂತ ದೇಶಗಳು

ಜಮ್ಮು ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ಉಗ್ರರು ನಡೆಸಿದ ಆತಂಕಿ ದಾಳಿಗೆ ಪ್ರತೀಕಾರವಾಗಿ ಭಾರತ ನಡೆಸಿದ ಆಪರೇಷನ್ ಸಿಂಧೂರ್ ನಲ್ಲಿ ಬ್ರಹ್ಮೋಸ್ ಸೂಪರ್‌ಸಾನಿಕ್ ಕ್ರೂಸ್ ಕ್ಷಿಪಣಿಯನ್ನು(BrahMos Supersonic Cruise Missile) ಪ್ರಯೋಗಿಸಲಾಗಿದೆ ಎಂಬ ವಿಚಾರ ಮೂಲಗಳಿಂದ ತಿಳಿದಿದೆ. 

ರಫೀಕಿ (ಶೋರ್ಕೋಟ್, ಜಾಂಗ್), ಮುರಿದ್ (ಚಕ್ವಾಲ್), ನೂರ್ ಖಾನ್ (ಚಕ್ಲಾಲಾ, ರಾವಲ್ಪಿಂಡಿ) ರಹೀಮ್ ಯಾರ್ ಖಾನ್, ಸುಕ್ಕೂರ್ ಮತ್ತು ಚುನಿಯನ್ (ಕಸುರ್) ನಲ್ಲಿರುವ ಪಾಕಿಸ್ತಾನಿ ವಾಯು ನೆಲೆಗಳನ್ನು ಗುರಿಯಾಗಿಸಿ ನಮ್ಮ ಭಾರತೀಯ ವಾಯು ಸೇನೆ ದಾಳಿ ನಡೆಸಿತ್ತು.

ಈ ದಾಳಿಯಲ್ಲಿ, ಸ್ಕಾರ್ಡು, ಭೋಲಾರಿ, ಜಕೋಬಾಬಾದ್ ಮತ್ತು ಸರ್ಗೋಧಾದಲ್ಲಿನ ವಾಯು ನೆಲೆಗಳು ಛಿದ್ರ ಛಿದ್ರವಾಗಿ ಧ್ವಂಸಗೊಂಡಿದ್ದವು. ಇದೀಗ ಈ ಬ್ರಹ್ಮೋಸ್ ಸೂಪರ್‌ ಸಾನಿಕ್‌ ಕ್ರೂಸ್‌ ಕ್ಷಿಪಣಿ ಖರೀದಿಗೆ ಘಟನಾನುಘಟಿ ದೇಶಗಳು ಸಾಲುಗಟ್ಟಿ ನಿಂತಿವೆ ಎಂದು ವರದಿಯಾಗಿದೆ. ಹಾಗಾದರೆ ಈ ಭಾರತದ ಘಾತಕ ಕ್ಷಿಪಣಿ ಖರೀದಿಗೆ ಸರತಿ ಸಾಲಿನಲ್ಲಿ ನಿಂತಿರುವ ದೇಶಗಳಾವುವು? ಎಂದು ನಾವು ತಿಳಿದುಕೊಳ್ಳೋಣ.

ಬ್ರಹ್ಮೋಸ್ ಸೂಪರ್‌ ಸಾನಿಕ್‌ ಕ್ರೂಸ್‌ ಕ್ಷಿಪಣಿ ಎಂದರೇನು?

ಬ್ರಹ್ಮೋಸ್ ಕ್ಷಿಪಣಿ ಭಾರತದ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿ.ಆರ್.ಡಿ.ಓ.) ಮತ್ತು ರಷ್ಯಾದ ಏನ್.ಪಿ.ಓ ಮಶಿನೋಸ್ಟ್ರೋಯೆನಿಯಾ ನಡುವಿನ ಜಂಟಿ ಉದ್ಯಮ ಮತ್ತು ಸಹಕಾರದ  ಮೂಲಕ ಅಭಿವೃದ್ಧಿಪಡಿಸಲಾದ ಸೂಪರ್‌ಸಾನಿಕ್ ಕ್ರೂಸ್ ಕ್ಷಿಪಣಿಯಾಗಿದೆ. 'ಬ್ರಹ್ಮೋಸ್' ಎಂಬ ಹೆಸರು ಭಾರತದ ಬ್ರಹ್ಮಪುತ್ರ ನದಿ ಮತ್ತು ರಷ್ಯಾದ ಮಾಸ್ಕ್ವಾ ನದಿಯ ಸಂಯೋಜಿತ ರೂಪವಾಗಿದ್ದು, ಈ ಪಾಲುದಾರಿಕೆಯನ್ನು ಮತ್ತು ಎರಡೂ ದೇಶಗಳ ನಡುವಿನ ಆತ್ಮೀಯ ಸ್ನೇಹ ಸಂಬಂಧವನ್ನು ಸೂಚಿಸುತ್ತದೆ. ಜನವರಿ 2022 ರಲ್ಲಿ ಮೂರು ಕರಾವಳಿ ರಕ್ಷಣಾ ಬ್ಯಾಟರಿಗಳಿಗಾಗಿ 32,000 ಕೋಟಿ ಬ್ರಹ್ಮೋಸ್ ಕ್ಷಿಪಣಿಯ ಒಪ್ಪಂದಕ್ಕೆ ಸಹಿ ಹಾಕಿರುವ ಫಿಲಿಪೈನ್ಸ್ ದೇಶ ಪ್ರಸ್ತುತ ಬ್ರಹ್ಮೋಸ್‌ಗಾಗಿ ದೃಢೀಕೃತ ಒಪ್ಪಂದವನ್ನು ಹೊಂದಿರುವ ಏಕೈಕ ಮಿತ್ರ ದೇಶವಾಗಿದೆ. ಈ ಒಪ್ಪಂದದ ಮೊದಲ ಬ್ಯಾಟರಿಯನ್ನು ಏಪ್ರಿಲ್ 2024 ರಲ್ಲಿ ಫಿಲಿಪೈನ್ಸ್ ದೇಶಕ್ಕೆ ಹಸ್ತಾಂತರಿಸಲಾಯಿತು. ಎರಡನೆಯ ಬ್ಯಾಟರಿ ವಿತರಣೆ ಈ ವರ್ಷ ನಡೆಯುವ ಸಾಧ್ಯತೆ ಇದೆ ಎಂದು ಬಲ್ಲ ಮೂಲಗಳಿಂದ ವರದಿಯಾಗಿದೆ. ಇದರ ಹೊರತಾಗಿ ಬ್ರಹ್ಮೋಸ್‌ ಕ್ಷಿಪಣಿ ಖರೀದಿಗೆ ಒಂದು ಡಜನ್‌ಗಿಂತಲೂ ಹೆಚ್ಚು ದೇಶಗಳು ಆಸಕ್ತಿ ತೋರಿವೆ ಎಂದು ಕೂಡ ಹೇಳಲಾಗಿದೆ. 

ಇಂಡೋನೇಷ್ಯಾ, ವಿಯೆಟ್ನಾಂ: ಬ್ರಹ್ಮೋಸ್ ಕ್ರೂಸ್ ಕ್ಷಿಪಣಿಯ ಸುಧಾರಿತ ಆವೃತ್ತಿಯನ್ನು ಖರೀದಿಸಲು ಇಂಡೋನೇಷ್ಯಾ 21,000ಕೋಟಿ ರೂ ನಿಂದ 29,000ಕೋಟಿ ರೂ. ಮೊತ್ತದ ಒಪ್ಪಂದದ ಬಗ್ಗೆ ಭಾರತದ ಜೊತೆಗೆ ಮಾತುಕತೆ ನಡೆಸುತ್ತಿದೆ. ವಿಯೆಟ್ನಾಂ ದೇಶ ಸಹ ತನ್ನ ಸೈನ್ಯ ಮತ್ತು ನೌಕಾಪಡೆ ಎರಡಕ್ಕೂ ಬ್ರಹ್ಮೋಸ್ ಕ್ಷಿಪಣಿಗಳ ಪೂರೈಕೆಯನ್ನು ಒಳಗೊಂಡ ಸುಮಾರು 59,000 ಕೋಟಿ ರೂ. ಬೃಹತ್ ಮೊತ್ತದ ಒಪ್ಪಂದವನ್ನು ಮಾಡಿಕೊಳ್ಳಲು ಯೋಚಿಸುತ್ತಿದೆ ಎಂದು ವರದಿಯಾಗಿದೆ.

ಮಲೇಷ್ಯಾ: ಮಲೇಷ್ಯಾ ದೇಶ ಸಹ ತನ್ನ ಸುಖೋಯ್ Su-30MKM ಫೈಟರ್ ಜೆಟ್‌ಗಳು ಮತ್ತು ಕೇದಾ-ವರ್ಗದ ಯುದ್ಧನೌಕೆಗಳಿಗೆ ಮತ್ತು ತನ್ನ ನೌಕಾ ಸೇನೆಗೆ ಬ್ರಹ್ಮೋಸ್ ಕ್ಷಿಪಣಿಗಳ ಖರೀದಿಗೆ ಮುಂದಾಗಿದೆ.

ಬ್ರೆಜಿಲ್, ಚಿಲಿ, ಅರ್ಜೆಂಟೀನಾ, ವೆನೆಜುವೆಲಾ:  ಈ ಲ್ಯಾಟಿನ್ ಅಮೆರಿಕನ್‌ ದೇಶಗಳು ಸಹ ಬ್ರಹ್ಮೋಸ್‌ ಖರೀದಿಯ ಮೂಲಕ ತಮ್ಮ ರಕ್ಷಣಾ ಕ್ಷೇತ್ರದ ಮತ್ತು ಸೈನ್ಯದ ಬಲವನ್ನುಹೆಚ್ಚಿಸಲು ಮುಂದಾಗಿವೆ.

ಈಜಿಪ್ಟ್, ಸೌದಿ ಅರೇಬಿಯಾ, ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ), ಕತಾರ್, ಓಮನ್: ಈ ಮಧ್ಯಪ್ರಾಚ್ಯ ದೇಶಗಳು ಸಹ ಬ್ರಹ್ಮೋಸ್‌ ಕ್ಷಿಪಣಿ ಖರೀದಿಗೆ ಆಸಕ್ತಿ ತೋರಿಸುತ್ತಿವೆ. ಅವುಗಳಲ್ಲಿ ಕೆಲವು ದೇಶಗಳೊಂದಿಗೆ ಮಾತುಕತೆ ಮುಂದುವರಿದ ಹಂತಗಳಲ್ಲಿವೆ ಮತ್ತು ಒಪ್ಪಂದ ಮಾಡಿಕೊಳ್ಳುವ ಕಾಲ ಸನ್ನಿಹಿತವಾಗಿದೆ.

ಥೈಲ್ಯಾಂಡ್, ಸಿಂಗಾಪುರ್, ಬ್ರೂನಿ:  ಈ ಆಗ್ನೇಯ ಏಷ್ಯಾದ ದೇಶಗಳು ಬ್ರಹ್ಮೋಸ್‌ ಖರೀದಿಯಲ್ಲಿ ಅತ್ಯಂತ ಹೆಚ್ಚಾಗಿದ ಆಸಕ್ತಿ ತೋರಿಸಿರುವ ಇನ್ನಿತರ ಪ್ರಮುಖವಾದ ದೇಶಗಳಾಗಿವೆ ಮತ್ತು ಈ ದೇಶಗಳ ಜೊತೆಗೂ ಸಹ ಮಾತುಕತೆ ವಿವಿಧ ಹಂತಗಳಲ್ಲಿ ಇದೆ .

ದಕ್ಷಿಣ ಆಫ್ರಿಕಾ, ಬಲ್ಗೇರಿಯಾ: ದಕ್ಷಿಣ ಆಫ್ರಿಕಾ ಮತ್ತು ಬಲ್ಗೇರಿಯಾ ದೇಶಗಳು ಕ್ಷಿಪಣಿಯ ಸಂಭಾವ್ಯ ಖರೀದಿಗಾಗಿ ಮಾತುಕತೆಯ ವಿವಿಧ ಹಂತಗಳಲ್ಲಿವೆ ಎಂದು ವರದಿಯಾಗಿದೆ.

ಬ್ರಹ್ಮೋಸ್ ಕ್ಷಿಪಣಿಯ ವ್ಯಾಪ್ತಿ

ಬ್ರಹ್ಮೋಸ್ ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಆಡಳಿತ (ಎಂ.ಟಿ.ಸಿ.ಆರ್.) ಕ್ಕೆ ಅನುಗುಣವಾಗಿ ಆರಂಭದಲ್ಲಿ 290 ಕಿ.ಮೀ.ಗೆ ಇದರ ವ್ಯಾಪ್ತಿಯನ್ನು ಸೀಮಿತಗೊಳಿಸಲಾಗಿತ್ತು, ಆದರೆ ಭಾರತ 2016 ರಲ್ಲಿ ಎಂ.ಟಿ.ಸಿ.ಆರ್. ಗೆ ಸೇರಿದ ನಂತರ ಭೂಮಿ ಮತ್ತು ಹಡಗು ಆಧಾರಿತ ಆವೃತ್ತಿಗಳಿಗೆ ಬ್ರಹ್ಮೋಸ್‌ನ ವ್ಯಾಪ್ತಿಯನ್ನು 800-900 ಕಿ.ಮೀ.ಗೆ ವಿಸ್ತರಿಸಲಾಗಿದೆ ಮತ್ತು ಇದರಿಂದ ಕ್ಷಿಪಣಿಯ ಶಕ್ತಿ ಇನ್ನೂ ಹೆಚ್ಚಾಗಿದೆ. ವಾಯು-ಉಡಾವಣಾ ಆವೃತ್ತಿಗಳು 450-500 ಕಿ.ಮೀ. ವ್ಯಾಪ್ತಿಯನ್ನು ತಲುಪುವ ಅಗಾಧವಾದ ಸಾಮರ್ಥ್ಯವನ್ನು ಹೊಂದಿವೆ.

ಬ್ರಹ್ಮೋಸ್ ಕ್ಷಿಪಣಿಯ ಸಾಮರ್ಥ್ಯ

ಬ್ರಹ್ಮೋಸ್ ಒಂದು ಬಹುಮುಖ ಕ್ಷಿಪಣಿಯಾಗಿದ್ದು, ಇದು ಭೂಮಿ, ಸಮುದ್ರ ಮತ್ತು ವಾಯು-ಆಧಾರಿತ ಗುರಿಗಳನ್ನು ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. ಇದನ್ನು ಭೂ-ಆಧಾರಿತ ಟ್ರಾನ್ಸ್‌ಪೋರ್ಟರ್ ಎರೆಕ್ಟರ್ ಲಾಂಚರ್‌ಗಳು (ಟಿ.ಈ.ಎಲ್.), ಹಡಗುಗಳು (ಲಂಬ ಮತ್ತು ಇಳಿಜಾರಾದ ಲಾಂಚರ್‌ಗಳು ಎರಡೂ), ಜಲಾಂತರ್ಗಾಮಿ ನೌಕೆಗಳು (ಮುಳುಗುವ ಸಾಮರ್ಥ್ಯ ಇರುವ ನೌಕೆಗಳು) ಮತ್ತು ಯುದ್ಧ ವಿಮಾನಗಳಿಂದ (Su-30MKI ನಂತಹ ಯುದ್ಧ ವಿಮಾನಗಳು) ಆರಾಮವಾಗಿ ಉಡಾಯಿಸಬಹುದು ಎಂದು ವರದಿಯಾಗಿದೆ.